O obxectivo das partidas é localizar sete antigas moedas perdidas na zona mariña e na zona terrestre das Illas. Un dos participantes no xogo asumirá o rol de Director ou Directora de Xogo (DX), e irá presentando aos demáis, a medida que percorran o taboleiro, todo tipo de tesouros ou ameazas inspiradas na natureza, historia e lendas que rodean este territorio.  O DX tamén dará información sobre a meteoroloxía e as mareas, que teñen repercusións na mecánica das partidas; e poderá someter aos xogadores e xogadoras a preguntas ou probas a cambio de outorgarlles pistas e dons que lles axuden na súa misión de atopar as moedas perdidas.

Así, os xogadores e xogadoras (referidos no regulamento como PX, Persoas Xogadoras ou Personaxes dos Xogadores) poderán acceder a recunchos que en moitos casos están vedados aos seres humanos. Polo seu propio pé, ou a lombos de distintas especies de animais terrestres, acuáticos e voadores, descubrirán a vida tinxida de verdes e azuis dos fondos mariños, ascenderán coas gaivotas xunto ás formidables paredes de rocha ata os ceos onde voa o vento que ouvea nas furnas costeiras, e correrán sobre as rochas, praias, toxeiras e uceiras ata o corazón segredo das fragas. O farán adoptando o punto de vista de insectos e aves, mamíferos, reptís, anfibios e especies mariñas; coa mirada máxica propia das xentes da mourindade, esa que permite albiscar monstros e outros seres fantásticos invisibles aos ollos humanos.

Se ben Illas das Marabillas pode definirse como xogo de rol de taboleiro, dende o punto de vista do regulamento e as posibilidades que ofrece encaixa no que se coñece no mundo dos xogos de mesa e dixitais como un sandbox, é dicir, un trasfondo cun set de ferramentas a partir das cales as persoas implicadas poden desenvolver a súa forma de xogar cunha gran flexibilidade. Alén do regulamento básico, que pode ser completado ou modificado con total liberdade, nesta web publicaranse propostas sobre como levar a cabo adaptacións ou extensións do xogo, incluídas ideas para o seu emprego nas aulas e a organización de macropartidas xuntando taboleiros de distintos arquipélagos. Tamén se poderá atopar información sobre o trasfondo e fichas de fauna, flora, novos seres máxicos e elementos que poiden servir de equipamento para os personaxes. 

A filosofía de base e que, na medida en que se inspira nun patrimonio compartido, Illas das Marabillas pertence tamén ás persoas que queren profundar nos seus segredos. Por iso, todas elas están invitadas a completar o repertorio de plantas, personaxes e animais que poboan estes arquipélagos, tanto no plano do seu patrimonio físico e tanxible, que debe ser respectado e recollido coa maior fidelidade posible, como a nivel do imaxinario das lendas e o folclore propio das illas e zonas circundantes, no que as novas xeracións, como suxeitos partícipes dunha cultura que lles é propia, poden ser parte activa e (re)creativa.